Nevir shid’ve come up here. No even hauf wiy an A’m awreadie pechin haird. Whit wis A hinkin? Climbin a hill? Stupit idea!
The auld yins, oor ancestors, wur richtly feart ae moontains. Dangerous places. Tae be avoidit, no sumwhur ye gang fur “fun”! The occasional divine hermit micht’ve foond enlightenment up in a heich cave, but A’m no holy mannie!
Time tae gang back. Nae shame in it! Naebdy’ll ken. In fact, the fowk comin up wull jist hink yer deid fit. 10.30 an yer oan yer wiy back doon? Musta stertit early! Aye, let’s sack it aff.
But here’s a flat bit comin up.
Aw, that’s better, a nice breeze oan this shooder.
An here’s sum rocks fur scrammlin — that’s ayewis fun.
Ooft, that’s a guid view anaw, luik hoo far A’ve come.
Maybe this isnae sae bad efter aw.
Written as part of #Scotstober2022 on Twitter (24th October — “pech”)
